في عام ٢٠١٠، لمن انتقلت اسرتي الى السودان نهائى ، عودة طوعية يعني ، حصلت لي حاجة في اول اسبوع لي في السودان اثرت علي شخصياً و خلتني متطرفة ضد النظام العام بشدة لحدي ما بعد سنتين ….. فتحوا فيني بلاغ ظريف كدا علي خلفية مقال كتبته عن الشهيدة عوضية عجبنا.....
الموضوع و ما فيه انو مشيت حديقة مع صديق و بنات خالاتي. الفكرة كانت انو نفسح اولاد بت خالتي. قبلي ما نطلع…. اتصلته بي صحبي عشان يجي و نتونس هناك.
اتجهنا على واحدة من الالعاب و انا و صديقي قعدنا في كنبة خشب كدا نتونس على بال ما يخلصوا اللعبة.
بنتونس و مبسوطين و الجو جميل و كل شيء……فجاة ظهر لينا واحد كدا من ناس النظام العام او امن المجتمع و قال: ممنوع ولد و بنت يقعدوا براهم هنا.
قلنا ليهو: نحنا منتظرين ناس و ما جينا برانا….
الاخ طبعاً ما اتفاهم و رفض انو يسمعنا.
الموضوع بقى جادي و قال لينا قوموا يلا معاي
قبلي ما نقوم، في راجل كبير قاعد مع اطفال في الكنبة الجمبنا قال لي الزول دا : الاتنين ديل قاعدين بتونسوا ساي ما عملوا شيء.
وانا في راسي بفكر انو مفروض الناس ديل، النظام العام او غيرهم، يشجعوا الناس يقعدوا في حتة عامة! و لا كيف؟!؟
صحبي طبعاً كان داير ينفعل معاهم و كدا لكن انا كنته ليسه جديدة في البلد و ما دايرة ادخل في حاجة ما مستعدة ليها و رضيت بالطلب بتاعوا: انو نطلع برا
فعلاً ، طلعنا برة و مشينا محل شربنا شاي و انتظرته بنات خالاتي و رجعنا البيت سوا…
بعد داك و لفترة طويلة اتعقدته من المرقه مع صديق او زميل….
2 comments:
"وانا في راسي بفكر انو مفروض الناس ديل، النظام العام او غيرهم، يشجعوا الناس يقعدوا في حتة عامة! و لا كيف؟!؟"
إنتي عارفه ؟
كل ما تحاولي تفكري إنو في منطق ورا القوانين أو الممارسات أو حتى ردود الأفعال بتاعت مؤسسات الدولة أو منسوبيها - واللي هي نفسها طبعاً بتاعت الحزب الحاكم ومنسوبيه - حتلقي نفسك عندك صداع شديد
ببساطة شديده: ما في منطق. في جنون بس.
It's just so bad.
حاجة غريبة الصراحة وطالما الناس قاعدين باحترمها أيه المانع يعني
على العموم نحن احسن من غيرنا ولو كنتي في السعودية كانوا بلغوا عنك ناس هيئة الأمر بالمعروف والنهي عن المنكر واتقبضت واتسجنت اترحلتي انت وصديقك لول
Post a Comment